काठमाडौं, कर्णाली स्वास्थ्य विज्ञान प्रतिष्ठानको दीक्षान्त समारोह आज आइतबार हुँदैछ। यस समारोहमा प्रतिष्ठानका कुलपति तथा प्रधानमन्त्री केपी शर्मा ओली र सहउपकुलपति स्वास्थ्य तथा जनसङ्ख्यामन्त्री प्रदीप पौडेल पनि सहभागी हुने कार्यक्रम रहेको छ।
प्रतिष्ठानका उपकुलपति डा. मंगल रावलले जानकारी दिए अनुसार, प्रतिष्ठानको १३ वर्षको इतिहासमा यो पहिलोपटक दीक्षान्त समारोह आयोजना भइरहेको छ। यस अवसरमा स्नातक र स्नातकोत्तर तहका ५६ जना विद्यार्थी दीक्षित हुनेछन्।
प्रस्तुत स्नातक र स्नातकोत्तर तहका विद्यार्थीहरू जनस्वास्थ्य, नर्सिङ, र चिकित्साशास्त्र विषयमा शिक्षा हासिल गरेर उत्तीर्ण भएका छन्।
आइतबारको समारोहमा प्रतिष्ठानको नवनिर्मित अत्याधुनिक शैक्षिक भवन (एकेडेमिक बिल्डिङ) र तिलगङ्गा आँखा अस्पतालको सहयोगमा सञ्चालनमा आउने आँखा केन्द्रको पनि उद्घाटन गरिनेछ। यो उद्घाटन कार्यक्रम प्रधानमन्त्री ओलीद्वारा सम्पन्न हुनेछ।