काठमाडौँ, नेपाल कम्युनिष्ट पार्टी (माओवादी केन्द्र) का नेताहरूले पार्टीलाई जनमुखी बनाउन र सङ्गठन विस्तार गर्न सुझाव दिएका छन्। पेरिसडाँडामा आज भएको परामर्श बैठकमा नेताहरूले सरकारमा गरेका सकारात्मक कामहरूलाई जनतामा पुग्नुपर्ने, सुशासन र समृद्धिको योजनामा भएको प्रगतिका बारेमा जानकारी गराउनुपर्ने धारणा राखेका थिए।
नेताहरूले पार्टीभित्र आन्तरिक एकतालाई बलियो बनाउन, एकीकृत रूपमा परिचालित हुन, र कुनै पनि विवाद वा द्वेष राख्न नहुनेमा जोड दिए। उनीहरूले वर्गतर्फ फर्कने वातावरण बनाउन नेतृत्वलाई आग्रह गरेका छन्। एकीकृत प्रयास गरेमा र विगतका गल्तीहरू स्वीकार गरेर अगाडि बढेमा पार्टी पुनःनिर्माण भएर प्रमुख शक्ति बन्न सक्ने धारणा व्यक्त गरेका छन्।
पार्टी अध्यक्ष पुष्पकमल दाहाल ‘प्रचण्ड’ले बैठक फलदायी भएको जानकारी दिएका छन् र पार्टीलाई थप सशक्त बनाउन केन्द्रित रहेको बताएका छन्। बैठकमा वरिष्ठ उपाध्यक्ष नारायणकाजी श्रेष्ठ, उपाध्यक्षद्वय पम्फा भुसाल र अग्निप्रसाद सापकोटालगायत नेताहरूको उपस्थिति रहेको थियो।