काठमाडौं, नेकपा (माओवादी केन्द्र)का अध्यक्ष र पूर्वप्रधानमन्त्री पुष्मकमल दाहाल प्रचण्डले सबै प्रकारका अराजकता र निरङ्कुशतावादी सोचका विरुद्ध नेपाल राष्ट्र र नेपाली जनतालाई एकताबद्ध गर्न आवश्यक रहेको बताएका छन्।
संविधान दिवस र राष्ट्रिय दिवसका अवसरमा बिहीबार बिहान जारी गरेको शुभकामना सन्देशमा प्रचण्डले नेपालका उत्पीडित वर्ग, जाति, क्षेत्र, लिङ्ग र समुदायलाई वर्तमान संविधानले अधिकार सम्पन्न बनाएको उल्लेख गरेका छन्।
प्रचण्डले भनेका छन्, “यस ऐतिहासिक दिवसको अवसरमा संविधान निर्माणमा योगदान दिने देशभित्र र बाहिरका सम्पूर्ण नेपाली जनताप्रति हार्दिक बधाई र शुभकामना व्यक्त गर्न चाहन्छु। देशलाई संघीय लोकतान्त्रिक गणतन्त्रको संविधान निर्माणको स्तरमा पुर्याउन महान् जनयुद्ध, ऐतिहासिक जनआन्दोलन, मधेश आन्दोलन लगायतका विभिन्न आन्दोलनमा प्राण उत्सर्ग गर्ने महान सहिदहरूलाई भावपूर्ण श्रद्धाञ्जली अर्पण गर्दछु।”