काठमाडौं, आईसीसी क्रिकेट विश्वकप लिग टु अन्तर्गत अमेरिकामा जारी त्रिकोणात्मक सिरिजमा नेपालले आफ्नो दोस्रो खेल स्कटल्याण्डविरुद्ध खेल्न लागेको छ। खेल नेपाली समय अनुसार राति सवा ९ बजे ग्राण्ड प्रेरी स्टेडियम, टेक्सासमा सुरु हुनेछ। यस सिरिजमा नेपाल, स्कटल्याण्ड, र अमेरिका प्रतिस्पर्धामा छन्।
नेपाल सिरिजको पहिलो खेलमा घरेलु टोली अमेरिकासँग ३ विकेटले पराजित भएको थियो। स्कटल्याण्डले भने पहिलो खेलमै अमेरिकालाई १० विकेटले पराजित गर्दै राम्रो लयमा रहेको देखाएको छ। नेपालले पहिलो खेलमा उत्कृष्ट ब्याटिङ गर्दै २८६ रन बनाएको भए पनि, बलिङमा सोही प्रदर्शन गर्न नसक्दा खेल गुमाउनुपर्यो।
नेपालको पछिल्लो प्रदर्शन कमजोर रहेको छ। लिग टु मा ७ खेल यता नेपालले जित निकाल्न सकेको छैन। सन् २०२४ को फेब्रुअरीमा नेदरल्याण्ड्सविरुद्ध घरेलु मैदानमा मात्र एक जित निकाल्न सफल नेपालले त्यसपछि जितविहीन सिरिज खेलेको हो। हालसम्म ९ खेलबाट जम्मा ३ अंकका साथ नेपाल ८ टोली सम्मिलित लिग टु मा सातौं स्थानमा रहेको छ। ९ खेलमा ७ हार, १ खेल बराबरी, र १ अंक पाएको नेपालले अब लिग टु मा स्थितिमा सुधार ल्याउने लक्ष्यका साथ मैदानमा उत्रनेछ।
हेड टु हेड
नेपाल र स्कटल्याण्डबीच अहिलेसम्म ६ ओडीआई खेल भएका छन्, जसमा दुवै टोलीले समान ३ खेल जितेका छन्। नेपालले आफ्नो पछिल्लो दुई खेलमा स्कटल्याण्डलाई कीर्तिपुरमा पराजित गरेको थियो भने, स्कटल्याण्डमै भएको खेलमा पनि नेपालले एक पटक जित हात पारेको थियो।
स्कटल्याण्डको तुलनामा कमजोर लयमा रहेको नेपालले लिग टु मा आफ्नो स्थिति सुधार गर्नका लागि बलियो खेल प्रदर्शन गर्नुपर्नेछ।