काठमाडौँ, हाल देशभर मनसुनी वायुको प्रभाव देखिएको छ। मौसम पूर्वानुमान महाशाखाका अनुसार, मनसुनको न्यून चापीय रेखा वर्तमानमा सरदर स्थानको दक्षिणतिर अवस्थित छ। यसका कारणले कोशी प्रदेशसहित देशको पहाडी क्षेत्र आंशिकदेखि साधारणतया बदली रहेको छ भने अन्य क्षेत्रहरूमा आंशिक बदलीदेखि मुख्यतया सफा रहेको छ। विशेषगरी, कोशी प्रदेशका केही स्थानमा हल्का वर्षा भइरहेको छ।
आज दिउँसोमा, देशभर आंशिकदेखि साधारणतया बदली रहनेछ। कोशी, बागमती, गण्डकी र लुम्बिनी प्रदेशका थोरै स्थानहरूमा चट्याङ्गसहित हल्का देखि मध्यम वर्षाको सम्भावना छ। कोशी र गण्डकी प्रदेशका केही स्थानमा भारी वर्षाको पनि सम्भावना रहेको छ।
आज राति पनि देशभर आंशिकदेखि साधारणतया बदली रहने छ। कोशी, मधेस, बागमती, गण्डकी र लुम्बिनी प्रदेशका केही स्थानहरूमा चट्याङ्गसहित हल्का देखि मध्यम वर्षा हुने सम्भावना छ। साथै, कोशी र बागमती प्रदेशका थोरै स्थानमा भारी वर्षा तथा एक-दुई स्थानमा अत्यधिक भारी वर्षा हुन सक्नेछ।
कोशी, गण्डकी र बागमती प्रदेशका केही स्थानमा भारी वर्षाको सम्भावना रहेकोले यी क्षेत्रमा गेग्रान बहाव, बाढी, पहिरो र भूक्षय जस्ता प्रकोपको जोखिम बढ्न सक्ने भएकाले स्थानीयलाई आवश्यक सतर्कता अपनाउन महाशाखाले अनुरोध गरेको छ।