काठमाडौं, चालु आर्थिक वर्षको पहिलो महिना साउनमा करिब ६० हजार नेपालीले विदेशमा रोजगारीको खोजी गरेका छन्।
वैदेशिक रोजगार विभागका अनुसार चालु आव २०८१/८२ साउनमा ५९ हजार ५५० जना नेपाली श्रम स्वीकृति लिएर विदेशिएका छन्। यो अघिल्लो आर्थिक वर्षको साउनमा विदेशिएका ५५ हजार ५७५ जनाको संख्याभन्दा केही बढी हो।
साउन महिनामा २५ हजार पाँच सयले संस्थागत श्रम स्वीकृति लिएर विदेश गएका छन् भने १० हजार ७ सय ५३ जनाले व्यक्तिगत श्रम स्वीकृति प्राप्त गरेका छन्। जीटूजी (सरकारी समझदारी) मार्फत ६६८ जना गएका छन्।
साउन महिनामा ५१ हजार ४३० जना पुरुष र ८ हजार ११४ जना महिला वैदेशिक रोजगारीका लागि गएका छन्। यो संख्या नयाँ र पुनः श्रम स्वीकृति दुवैको हो।
मलेसिया जाने नेपालीको संख्या घटेको छ। साउनमा मलेसियामा १ हजार ३४४ जना गएका छन्, जुन कोभिड-१९ पछि अहिलेसम्मकै ठूलो गिरावट हो। अघिल्लो आर्थिक वर्षको साउनमा मलेसिया गएका श्रमिकको संख्या ९ हजार २३८ थियो। यो संख्यामा कमी मलेसियाले आप्रवासी श्रमिक ल्याउनेमा कटौती गरेको कारण आएको हो।
विभागका निर्देशक गुरुदत्त सुवेदीका अनुसार, साउनमा सबैभन्दा धेरै नेपाली यूएई गएका छन्। साउन महिनामा यूएईमा १७ हजार ५४१ जना गएका छन्। दोस्रो स्थानमा साउदी अरेबिया छ जहाँ ११ हजार ८०९ नेपाली गएका छन् भने तेस्रो स्थानमा कतारमा ११ हजार ७८५ नेपाली गएका छन्।
कुवेतमा ४ हजार ६९५, जापानमा १ हजार ४७२, र दक्षिण कोरियामा ८१२ जना वैदेशिक रोजगारीको खोजीमा गएका छन्।
साउन महिनामा युरोपमा जाने नेपालीको संख्या पनि बढेको छ। रोमनीया सबैभन्दा ठूलो गन्तव्य भएको छ जहाँ २ हजार २९८ जना नेपाली वैदेशिक रोजगारीमा गएका छन्। क्रोएसियामा १ हजार १३८, साइप्रसमा ७ सय, माल्टा २३९, पोर्चुगलमा १५६, र पोल्यान्डमा ५० जना गएका छन्।