दीपेन्द्र सिंह ऐरीले नेपाल प्रिमियर लिगमा कार जिते

काठमाडौं, सुदूरपश्चिम रोएल्सका कप्तान दीपेन्द्र सिंह ऐरीले नेपाल प्रिमियर लिग (एनपीएल) मा कार पुरस्कार प्राप्त गरेका छन्। आफ्नो नेतृत्वमा सुदूरपश्चिमलाई फाइनलसम्म पुर्‍याएका दीपेन्द्रले टिम उपविजेता बनेपनि व्यक्तिगत उपलब्धी भने हात पारे।

दीपेन्द्रले एनपीलको नेपाली खेलाडीतर्फ प्लेअर अफ दि सिरिज बन्दै ओमोडा ई ५ कार पुरस्कार प्राप्त गरेका हुन्। ललित राजवंशी र रोहित पौडेल पनि कारको होडमा भएपनि दीपेन्द्रले बाजी मारे।

टिमले उपाधि जित्न नसकेपनि दीपेन्द्रले कप्तानी देखि ब्याटिङ, बलिङ र फिल्डिङ तीन क्षेत्रमा उत्कृष्ट अलराउण्ड प्रदर्शन गरेका थिए। कप्तान भए पनि विना दबाब खेल्ने र आवश्यक परेका बेला ब्याटिङ, बलिङ र फिल्डिङ जता पनि तयार हुने खेलाडीको रूपमा उनले आफ्नो क्षमता देखाए। क्वालिफायर वान मा सुदूरले जनकपुरलाई हराएपछि प्लेअर अफ दि म्याच बनेका सुदूरका खेलाडी विनोद भण्डारीले पनि दीपेन्द्रलाई बेस्ट प्लेअर भनेका थिए।

दीपेन्द्रले एनपीएलमा ९ खेल खेल्दा १ अर्धशतक सहित २२७ रन बनाए। उनले पहिलो खेलमै विराटनगर विरुद्ध अविजित ४७ रन बनाउँदै प्लेअर अफ दि म्याच बनेका थिए। त्यसपछि उनले टिमको अवस्था अनुसार ब्याटिङ पोजिसन चेन्ज गरेर ब्याटिङ गरे। काठमान्डु गुर्खखाज विरुद्ध ४३ रन बनाएका उनले लुम्बिनीविरुद्ध अविजित ४३ रन जोडे। चितवन विरुद्ध १ रनमा आउट भएका उनले जनकपुरविरुद्ध खाता खोल्न सकेनन्। पोखरा विरुद्ध २०, कर्णाली विरुद्ध ३८ रन बनाए। क्वालिफायर वान मा जनकपुर विरुद्ध २० रन बनाएका थिए। साथै उनले जनकपुरविरुद्ध ३ विकेट समेत लिए जुन उनको बेस्ट बलिङ फिगर हो।

दीपेन्द्रले बलिङमा ९ खेलमा कुल ९ विकेट नै लिए। फाइनलमा भने दीपेन्द्र चल्न सकेनन्। उनले ब्याटिङमा ९ रनमा आउट हुँदै बलिङमा १ विकेट मात्र लिएका थिए।

त्यस्तै, प्लेयर अफ दि टुर्नामेण्ट सुदूरपश्चिमका सेफ अली जैब पाए, जसले ५ लाख रूपैयाँ प्राप्त गरे। प्रतियोगिताको सर्वोत्कृष्ट बलर ललित राजवंशी बने, उनले मोटरसाइकल पुरस्कार प्राप्त गरेका छन्। उदीयमान खेलाडी कर्णाली याक्सका विपिन प्रसाद शर्माले पाए, जसले ५० हजार नगद र एक लाख बराबरको छात्रवृत्ति पाएका छन्।

त्यस्तै, इनर्जेटिक प्लेयर अफ द टुर्नामेण्ट जनकपुरका जिमी नीशमले पाए, जसले २ लाख रूपैयाँ प्राप्त गरेका छन्। म्याक्सिमम चौका अवार्ड लाहिरु मिलान्थाले पाएका छन्। फेयर प्ले अवार्ड लुम्बिनी लायन्स टिमले प्राप्त गरेको छ।