काठमाडौं, म्याटेओ गाब्बियाले अन्तिम मिनेटमा गोल फर्काएपछि एसी मिलानले इन्टर मिलानविरुद्ध रोमाञ्चक जित निकालेको छ।
इटालियन सिरि ए अन्तर्गत भएको मिलान डर्बीमा एसी मिलानले २–१ को नतिजामा जीत दर्ता गर्यो।
आइतबार राति भएको खेलमा एसी मिलानले पहिलो हाफको १० औं मिनेटमा क्रिस्टियन पुलिसिकको गोलमार्फत सुरुआती अग्रता लियो। तर २७ औं मिनेटमा फेडेरिको डिमार्कोको गोलले इन्टर मिलानलाई खेलमा फर्कायो।
दोस्रो हाफमा दुवै टोलीले गोल गर्नको लागि कडा संघर्ष गरे पनि सफल हुन सकेनन्। तर ८९ औं मिनेटमा गाब्बियाले गोल गरेर एसी मिलानलाई रोमाञ्चक जित दिलाए, जसले गर्दा उनीहरूले अंक तालिकामा तीन अंक थप्न सफल भए।
गएराति भएको अन्य खेलमा रोमाले उडिनेसँग ३–० को फराकिलो जित निकाल्यो, जबकि बोलाग्नाले मोन्जालाई र फियोरेन्टिनाले लाजियोमाथि समान २–१ को नतिजा निकाले।