काठमाडौं, साफ यु-२० च्याम्पियनसिपअन्तर्गत समूह ए को अन्तिम खेलमा नेपालले बंगलादेशलाई २-१ ले हराउँदै समूह विजेता बनेको छ।
नेपालका लागि समिर तामाङ र निराजन धामीले गोल गरे। खेल सातदोबाटोस्थित एन्फा कम्प्लेक्समा भएको थियो, जहाँ नेपालले पहिलो २० मिनेटभित्रै दुई गोल गर्यो। बंगलादेशले भने पहिलो हाफमा पेनाल्टीमार्फत एक गोल फर्कायो।
नेपालका प्रमुख प्रशिक्षक उर्जन श्रेष्ठले यो खेल जित्नैपर्ने अवस्था रहेको बताएका छन्। उनले भने, ‘उनीहरूलाई बराबरी पनि पर्याप्त थियो, त्यसैले हामीले गोल गरेपछि उनीहरूले थप आक्रमण गरे र दबाब दिए। लामो बलमा हामीलाई केही समस्या भयो। दोस्रो हाफमा भने मिडफिल्डमा नियन्त्रण कायम गरेर खेल्यौं।’