काठमाडौं, युक्रेनी सेनाले रुसको कुर्स्क क्षेत्रमा प्रवेश गरेको युक्रेनका राष्ट्रपति भ्लोदोमिर जेलेन्स्कीले बताएका छन्। उनले बुधबार सामाजिक सञ्जालमा लेख्दै, युक्रेनी सेनाले कुर्स्क क्षेत्रमा एकदेखि दुई किलोमिटरसम्मको भूभाग ओगटेको जानकारी दिएका छन्। राष्ट्रपति जेलेन्स्कीले ट्वीटर (हाल एक्स)मा पोस्ट गरेका फोटो र भिडियोहरूमा उनले सेनाका शीर्ष कमाण्डर ओलेकजेन्ड्र सिरस्कीसँग छलफल गरिरहेको देखिन्छ। सिरस्कीले रुसको भूमिमा भएको आक्रमणको क्रममा १०० जना रुसी सेनालाई नियन्त्रणमा लिइएको र युक्रेनी सेनालाई रुसी नियन्त्रणबाट मुक्त गराउन सकिने विश्वास व्यक्त गरेका छन्।
बीबीसीका अनुसार युक्रेनी सेनाले रुसको भूमिमा कति क्षेत्र ओगटेको स्पष्ट नभए पनि, रुसले दुई दिनअघि युक्रेनी सेनाको कुर्स्क क्षेत्रमा प्रवेशलाई स्वीकार गरेको थियो। हाल युक्रेनी सेनाले रुसका केही बस्तीहरूमा कब्जा जमाउन सफल भएको रिपोर्ट गरिएको छ।
बीबीसीका रिपोर्ट अनुसार, युक्रेनी सेनाले आफ्नो समन्वयको प्रभावले रुसमा सफलतापूर्वक आक्रमण गर्न सकेको हो। बेलायती सैनिक अधिकारीहरूका अनुसार, युक्रेनी सेनाले पश्चिमी देशहरूले उपलब्ध गराएका अत्याधुनिक हतियारहरू, जस्तै जर्मनीको मोर्डर र अन्य बख्तरबन्द गाडीहरू प्रयोग गरिरहेको छ।
भारतले रुसमा रहेका आफ्ना नागरिकहरूलाई सतर्क रहन र ब्रेन्स्क, बेलगोरोद, र कुर्स्क क्षेत्रहरू छोड्न अनुरोध गरेको छ। भारतीय दूतावासले सहयोग आवश्यक परे सम्पर्क गर्न इमेल र टेलिफोन नम्बर सार्वजनिक गरेको छ।