बुटवल । राष्ट्रिय जनमोर्चाको केन्द्रीय समितिको बैठक बुटवलमा सम्पन्न भएको छ । पार्टीका अध्यक्ष चित्रबहादुर केसीको अध्यक्षतामा शनिबार र आइतबार बसेको बैठकले मुलुकको वर्तमान राजनीतिक, आर्थिक र राष्ट्रियतासम्बन्धी अवस्थाबारे गम्भीर छलफल गर्दै विभिन्न निर्णयहरू सार्वजनिक गरेको छ ।
बैठकले दुई ठुला दलले स्थायित्व दिनका लागि बनाएको सरकार असफल भएको निष्कर्ष निकालेको छ। भ्रष्टाचार घट्नुको सट्टा बढिरहेको, न्यायपालिका निष्पक्ष भूमिकामा कमजोर देखिएको, बेरोजगारी र महँगी चुलिँदै गएको भन्दै बैठकले चिन्ता व्यक्त गरेको छ ।
जनताको असन्तोषलाई राजावादी र नयाँ भनिने शक्तिहरूले आफ्नो राजनीतिक स्वार्थका लागि प्रयोग गरिरहेको भन्दै जनमोर्चाले त्यसविरुद्ध सङ्घर्ष गर्नुपर्नेमा जोड दिएको छ ।
बैठकले मुलुकमा देखिएका समस्या समाधान उच्चस्तरीय लोकतन्त्र र गणतन्त्रको संस्थागत विकासमार्फत मात्र सम्भव हुने ठहर गर्दै त्यसको आधार तयार पार्नुपर्नेमा जोड दिएको छ ।
साथै, भारत–चीनबिच लिपुलेकलाई व्यापारिक नाका बनाउन भएको सहमतिले नेपालको सार्वभौमसत्ता र अखण्डतामा गम्भीर चोट पुर्याएको भन्दै सो सहमतिको खारेजीमा जोड दिएको छ।
कालापानीमा भारतीय सेनाको लामो उपस्थितिलाई स्मरण गर्दै बैठकले चीन र भारत दुवैको साम्राज्यवादी नीतिको विरोध गर्ने निर्णय गरेको बैठकपछि केसीले आइतबार जारी गरेको विज्ञप्तिमा उल्लेख छ ।
बैठकले भाद्र २५ देखि असोज ५ गतेसम्म १२ दिने देशव्यापी जागरण अभियान सञ्चालन गर्ने निर्णय गरेको छ। सो अभियानअन्तर्गत विरोधसभा, कोणसभा, ज्ञापनपत्र बुझाउने, प्रचार–प्रसार, जनभेटघाट तथा प्रशिक्षण जस्ता कार्यक्रम गरिने जनाइएको छ ।
रुपन्देही क्षेत्र नम्बर ३ को प्रतिनिधिसभा उपनिर्वाचनमा पार्टीले सहभागी हुने र यसका लागि केन्द्रीय सल्लाहकार बद्रे आलम मुसलमानलाई उम्मेदवार बनाउने निर्णय पनि बैठकले गरेको छ। गठबन्धन नगरी एक्लै निर्वाचनमा जाने निर्णय पार्टीले गरेको छ ।
सङ्गठनात्मक निर्णयअन्तर्गत केन्द्रीय सदस्य पियारी थापाले व्यक्तिगत कारणले समितिमा निरन्तरता दिन असमर्थ भएकाले उनलाई हटाई, रुपन्देहीकै कमला बन्जाडेलाई नयाँ सदस्य बनाइएको छ ।
बैठकले पार्टीको पाँचौँ राष्ट्रिय सम्मेलन आगामी वर्ष मंसिरमा गर्ने निर्णय पनि गरेको छ। सम्मेलनको मिति, स्थान र तयारीसम्बन्धी विषय आगामी केन्द्रीय समितिको बैठकले तय गर्ने जनाइएको छ ।