काठमाडौं, भारतमा जारी खो खो विश्वकप अन्तर्गत शुक्रबार नेपालका पुरुष र महिला दुवै टोली क्वार्टरफाइनल खेल्दै छन्। महिला टोली इरानसँग प्रतिस्पर्धा गर्नेछ भने पुरुष टोली बंगलादेशसँग भिड्नेछ।
नेपाल र इरानको महिला टोलीबीचको खेल अपराह्न ४:४५ बजे सुरु हुनेछ। विजेताले युगाण्डा र न्युजिल्याण्डबीचको विजेतासँग सेमिफाइनलमा प्रतिस्पर्धा गर्नेछन्। त्यसैगरी, नेपाल र बंगलादेशको पुरुष टोलीबीचको खेल साँझ ६ बजे सुरु हुनेछ। विजेताले इरान र केन्याबीचको विजेतासँग फाइनल प्रवेशका लागि खेल्नेछन्।
नेपालको महिला टोली समूह सी को विजेताका रूपमा क्वार्टरफाइनलमा पुगेको हो। समूह चरणमा अपराजित रहेको नेपालले भुटान, जर्मनी, श्रीलंका, र बंगलादेशलाई पराजित गरेको थियो। पुरुष टोली भने समूह ए को उपविजेताका रूपमा क्वार्टरफाइनलमा पुगेको हो। समूह चरणमा भारतसँग पराजित भए पनि पेरू, ब्राजिल, र भुटानलाई हराउँदै अगाडि बढेको हो।