काठमाडौं, बेलायतका राजकुमार एडवर्डले सन् २०२५ को पहिलो विदेश भ्रमण नेपालबाट सुरु गर्ने भएका छन्। उनले पत्नी सोफीसहित पारिवारिक भ्रमणका लागि आगामी ४ फेब्रुअरीमा नेपाल आगमन गर्ने तयारी गरेका हुन्।
शाही परिवारको आधिकारिक वेबसाइटमा उनीहरूको नेपाल भ्रमणको योजना उल्लेख गरिएको छ, यद्यपि भ्रमणको विस्तृत तालिका भने हालसम्म सार्वजनिक गरिएको छैन।
एडवर्ड र सोफी एसियाली देशहरूको भ्रमणमा निस्कन लागेका छन्, जसको सुरुवात नेपालबाट हुनेछ। यसअघि, २०२४ को अक्टोबरमा, उनीहरूले माल्टाको भ्रमण गरेका थिए।
राजकुमार एडवर्ड र सोफीको नेपाल भ्रमणले बेलायती शाही परिवारको नेपालसँगको ऐतिहासिक सम्बन्धलाई थप मजबुत बनाउने अपेक्षा गरिएको छ। यसअघि, २०७२ सालमा बेलायतका राजकुमार ह्यारीले नेपाल भ्रमण गर्दा बर्दिया, लमजुङ, र पोखरा भ्रमण गरेका थिए।
बेलायत र नेपालको सम्बन्धको सुरुवात सन् १८५२ मा तत्कालीन प्रधानमन्त्री जंगबहादुर राणाबाट भएको थियो। बेलायतकी महारानी एलिजाबेथले पनि सन् १९६१ र १९८६ मा नेपाल भ्रमण गरेकी थिइन्। यस्तै, राजकुमार चार्ल्स, युवराज्ञी डायना, र राजकुमार फिलिपले पनि नेपाल भ्रमण गरेका थिए।
प्रिन्स एडवर्ड, जो बेलायतकी महारानी एलिजाबेथ द्वितीया र प्रिन्स फिलिपका कान्छा सन्तान हुन्, हाल बेलायती राजगद्दीको उत्तराधिकारी क्रममा १४ औं स्थानमा छन्।