काठमाडौँ, कांग्रेस-एमाले गठबन्धन सरकारले समानुपातिक निर्वाचन प्रणालीमा प्रतिनिधित्वका लागि न्यूनतम मत प्रतिशत (थ्रेसहोल्ड) को सीमा बढाउने तयारी गरेको छ।
सरकारले नयाँ कानुनी प्रावधानसँगै राजनीतिक दललाई प्रतिनिधि सभा चुनावमा कम्तीमा पाँच प्रतिशत र प्रदेश सभा चुनावमा तीन प्रतिशत मत ल्याउनुपर्ने नियम लागू गर्ने योजना बनाएको छ। यसले अहिलेको कानुनी प्रावधानमा रहेको तीन प्रतिशत र १.५ प्रतिशतको सीमा बढाउने हो।
विधेयक मस्यौदामा भनिएको छ कि, “समानुपातिक प्रणालीमा प्रतिनिधि सभा सदस्यको निर्वाचनमा कम्तीमा पाँच प्रतिशत र प्रदेश सभा सदस्यको निर्वाचनमा कम्तीमा तीन प्रतिशत मत प्राप्त गर्ने दलबाट मात्र उम्मेदवार निर्वाचित हुनेछ।”
गृह मन्त्रालयले विधेयक मस्यौदालाई सहमतिका लागि कानुन, न्याय र संसदीय मामिला मन्त्रालयमा पठाइसकेको छ। प्रारम्भिक मस्यौदामा ‘थ्रेसहोल्ड’ समान राखिएको थियो, तर गृह मन्त्रालयले यसमा संशोधन गर्दै प्रतिशतको सीमा वृद्धि गरेको हो।