काठमाडौं, प्रतिनिधि सभाका सभामुख देवराज घिमिरे र राष्ट्रिय सभाका अध्यक्ष नारायण दाहालले संविधान दिवसको अवसरमा शुभकामना दिएका छन्।
घिमिरेले संविधानको मूलतत्त्व र भावनाले निर्दिष्ट गरेको समाजवाद उन्मुख आर्थिक-सामाजिक प्रणाली, सङ्घीय लोकतान्त्रिक गणतन्त्र र समानुपातिक समावेशीताका प्रावधानलाई सबैले पालना गर्नुपर्नेमा जोड दिएका छन्। उनले संविधानको इमान्दारितापूर्वक पालना गर्न प्रेरणा मिलोस् भन्ने आशा व्यक्त गरे।
त्यसैगरी, राष्ट्रियसभा अध्यक्ष नारायण दाहालले संविधान संशोधनको प्रक्रियालाई सम्मान गर्दै प्राप्त उपलब्धिहरूको रक्षा गर्न र थप प्रगति गर्न मार्ग प्रशस्त गर्नुपर्ने बताएका छन्। उनले संविधानको स्वामित्व र अपनत्व बढाउँदै समयानुकूल सुधार र परिमार्जन स्वाभाविक प्रक्रिया भएको बताएका छन्।
आज, २०७२ सालको असोज ३ गते जारी गरिएको सङ्घीय लोकतान्त्रिक गणतन्त्र नेपालको संविधानको ऐतिहासिक उपलब्धिको सम्झना गर्दै संविधान र राष्ट्रिय दिवस मनाइँदैछ।