काठमाडौं, देशभर हाल मनसुनी वायुको प्रभाव देखिएको छ। मौसम पूर्वानुमान महाशाखाका अनुसार, मनसुनको न्यून चापीय रेखा सरदर स्थानभन्दा दक्षिणतिर रहेकोले पहाडी भूभाग लगायत कर्णाली र सुदूरपश्चिम प्रदेशमा साधारण बदली भइरहेको छ भने अन्य क्षेत्रमा आंशिक बदली छ। कोशी, बागमती, लुम्बिनी र सुदूरपश्चिम प्रदेशका केही स्थानहरूमा हल्कादेखि मध्यम वर्षा भइरहेको छ।
आज दिउँसो सुदूरपश्चिम प्रदेशमा पूर्ण बदली तथा अन्य प्रदेशहरूमा आंशिक बदली रहने सम्भावना छ। विशेष गरी सुदूरपश्चिम प्रदेशका धेरै स्थानहरूमा चट्याङ्गसहित हल्कादेखि मध्यम वर्षा हुन सक्नेछ। कोशी, बागमती, लुम्बिनी, र सुदूरपश्चिमका एक–दुई स्थानमा हावाहुरीसहित भारी वर्षा हुने सम्भावना पनि रहेको छ।
महाशाखाले रातिको लागि सुदूरपश्चिम प्रदेशमा पूर्ण बदली र अन्य प्रदेशहरूमा आंशिक बदली रहने बताएको छ। साथै, गण्डकी, लुम्बिनी र सुदूरपश्चिम प्रदेशका केही स्थानहरूमा हावाहुरीसहित भारी वर्षाको सम्भावना रहेको छ। लुम्बिनी र सुदूरपश्चिमका केही स्थानहरूमा धेरै भारीदेखि अति भारी वर्षा हुने चेतावनी दिइएको छ।
महाशाखाले कोशी, बागमती, गण्डकी, लुम्बिनी, र सुदूरपश्चिम प्रदेशमा हावाहुरीसहित भारी वर्षाको सम्भावना रहेकोले ती क्षेत्रमा बाढी, पहिरो तथा भूक्षयजस्ता प्रकोपहरूबाट बच्न आवश्यक सतर्कता अपनाउन आग्रह गरेको छ।